हुतात्मा भवन भूमिपूजनाला होणार ३० मार्च रोजी

हुतात्मा भवन भूमिपूजनाला होणार ३० मार्च रोजी

बेळगाव - बेळगाव तालुका महाराष्ट्र एकीकरण समितीच्या वतीने हिंडलगा येथील हुतात्मा स्मारकासमोर हुतात्मा भवन बांधण्यास चालना देण्यात आली आहे.भवन उभारण्याच्या निर्मितीसाठी 51 जणांची बांधकाम समिती करण्यात आली आहे. आणि भवन उभारणीसाठी ज्यांनी देणग्यांची घोषणा केली आहे, त्यांना देणग्या जमा करण्याचे आवाहन करण्याचा निर्णय तालुका महाराष्ट्र एकीकरण समितीच्या बैठकीत घेण्यात आला आहे.

बेळगाव तालुका समितीच्या नियंत्रण समितीची बैठक मराठा मंदिर सभागृहात काल रविवारी संपन्न झाली. कार्याध्यक्ष, माजी आमदार मनोहर किणेकर अध्यक्षस्थानी होते.बैठकीत गेल्या अनेक दिवसांपासून हिंडलगा येथील हुतात्मा स्मारक आवारात हुतात्मा भवन उभारण्याबाबत चर्चा करण्यात आली आहे. पण, त्या कामाला मूर्त स्वरूप येत नसल्यामुळे आता या कामाला चालना देण्यात येणार आहे.

या भवनासाठी आतापर्यंत अनेकांनी 14 लाख रुपयांची देणगी जाहीर करण्यात आली आहे. त्यापैकी 4 लाख 34 हजार रुपये समितीकडे जमा आहेत. त्यामुळे ज्यांनी देणगी जाहीर केली होती, त्यांना पैसे जमा करण्यासाठी आवाहन करण्याचा निर्णय घेण्यात आला.हुतात्मा स्मारक आवारात हुतात्म्यांच्या स्मृती जपण्यासाठी दालन, मंगल कार्यालय असा आराखडा तयार करण्यात आला आहे. या भवनाच्या कामासाठी मध्यवर्ती समितीच्या बैठकीत 51 जणांची बांधकाम समिती स्थापन करणे, त्यामध्ये केवळ समितीनिष्ठ लोकांचीच वर्णी लावणे, यावर चर्चा करण्यात आली.

तर हुतात्मा स्मारक ट्रस्टमध्ये 11 जणांची नावे आहेत. त्यामध्ये ज्यांचे निधन झाले आहे. त्याठिकाणी नव्यांचा समावेश केला जाणार असून 30 मार्च रोजी हुतात्मा भवन कामाचे भूमीपूजन करण्याचा निर्णय घेण्यात आला आहे. बैठकीत या भवनचे बांधकाम कसे असावे यासंदर्भात चर्चा करण्यात आली.यावेळी माजी आमदार मनोहर किणेकर, सरचिटणीस अ‍ॅड. एम. जी. पाटील व इतरांनी मनोगत व्यक्त केले. यावेळी बी. एस. पाटील, आर. एम. चौगुले, रामचंद्र मोदगेकर, मल्लाप्पा गुरव, मल्लाप्पा पाटील, लक्ष्मण होनगेकर, दीपक पावशे, शंकर कोनेरी, डी. बी. पाटील, अंकुश पाटील, रामचंद्र कुद्रेमणीकर आदी उपस्थित होते.