सर्दी, खोकला लागलाय मग मास्क वापरा

सर्दी, खोकला लागलाय मग मास्क वापरा

राज्य सरकारचा आदेश ; जेष्ठाना ही सूचना 

 बेळगाव, ता.१८ : कर्नाटक सरकारने सोमवारी (ता.१८) जारी केलेल्या निर्देशानुसार राज्यातील सहव्याधी असलेल्या 60 वर्षे वयावरील व्यक्ती आणि खोकला, कफ व तापाची लक्षणे अढळणाऱ्यांनी फेस मास्क वापरणे अनिवार्य आहे.  शेजारील केरळ राज्यात कोरोनाचा (कोविड -19) उपप्रकार असलेला रुग्ण आढळून आल्यामुळे हा निर्णय घेण्यात आला आहे. राज्याचे आरोग्य मंत्री दिनेश गुंडुराव माध्यमांशी बोलताना म्हणाले की, संबंधित लक्षणे आढळणाऱ्या संशयित रुग्णांना शोधण्यासाठी वाढीव चांचण्या घेण्याचे आदेश आरोग्य विभागाला  देण्यात आले आहेत.

याबरोबरच राज्याच्या सीमावर्तीय जिल्ह्यांमध्ये अधिक तपासणी ठेवण्याबरोबर उपाययोजना आणण्यस सांगण्यात आले आहे. परिस्थितीवर बारीक लक्ष ठेवण्यात आले असून लोकांनी एकत्र येण्यास किंवा गर्दी करण्यास कोणतेही निर्बंध घालण्यात आलेले नाहीत. मात्र, यावर सरकारकडून आवश्यक त्या सूचना दिल्या जातील. परंतु जनतेने चिंता करण्याचे कारण नाही, असे मंत्री राव यांनीसांगितले. 

दोन दिवसांपूर्वी बैठक झाल्यानंतर आवश्यक उपाययोजनांवर चर्चा करण्यासाठी डॉ. के. रवी यांच्या नेतृत्वाखालील तांत्रिक सल्लागार समितीने बैठक बोलावली होती. त्या बैठकीत वरील प्रमाणे फेस मास्क संदर्भात निर्णय घेण्यात आला. त्यानुसार सरकारने जनतेला फेस मास्क वापरण्याची सूचना केली असून हॉस्पिटल्स आणि आरोग्य केंद्रांना सज्ज राहण्याची सूचना दिल्या आहेत. सरकारच्या आदेशानुसार आता राज्याच्या केरळ जवळील कोडगू, मंगळूर आणि चामराज नगर या सीमावर्तीय जिल्ह्यांमध्ये अधिक तपासणी आणि बारीक लक्ष ठेवण्याचे आदेश दिले आहेत.